25/02/19

“namōtha mistahi ī-nōhtī-pī-itohtīyān ōta,” itwīw kisītiniw, “kākikī māna ī-tasīhkīt.” kī-naki-pimohtīw ikwa ī-ohpiskwīyit ta-ay-itāpit. misiwī nanātohk maskosiya ī-kī-ohpikihki. kahkithaw ispātinawa kī-askihtakonākwana. ikwa ī-kī-ati-thōcisihk,waskawīpathiwa tāpiskōc ī-nīmimakahki. “kayās kī-piyako-apiw. mihcītwāw pītotīthihtākosiw māka kiyām. ikāwitha omisimāmitonithim! mistahi kisīwatisiw wītha.” itwīw ī-takosihkwāw nīkān wāskahikanihk.

kotak nāpīw awa kī-ati-sīhkipitisot ī-nitohtawāt. mistahi kī-kwāhtohtīwak ita kā-wīkicik ta-takohtīcik ōta ikwa tāpwī mistahi ī-nīstokātīt.

nistwāw kī-pāh-pāwīhikīt ana kisītiniw māka nama awiyak kī-apiw.“cīskwa” itwīw kisītiniw, “nipihtawāw awiyak ī-mācosit. ahpō itikwī ayāw otānāhk.”

otānāhk wāskahikanihk sisonī sīpīsis kī-nipawīthiwa iskwīwa. namōtha kihtīwithiwa wītha nānitaw ‘nistomitanaw ī-itahtopiponīthit itikwī’ māmitonithimīw nāpīw. ī-kī-sīkiwīpinikīthit sīpīsihk isi ikwa wāspisonāhtik astīw asicāyihk mistikohkikotī.

“pīhin ōta. niwī-nitawi-mitho-atamiskawāw.” itwīw kisītiniw.

katisk kā-kī-takosihk sisonī sīpīsihk, mistahi ati-mātow pīpīsis.

“kicimākānīs,nipīpīsim,” itwīw iskwīw, “nistwāw kā-yīkitot ōma pīsim.”

Leave a Reply

Your email address will not be published. Required fields are marked *